नुवाकोट । जापानस्थित गैरआवासीय नेपाली संघ (एनआरएनए) कान्साईले नुवाकोटका विध्यार्थिलाई छात्रवृत्तिको रकम हस्तान्तरण गरेको छ। पञ्चकन्या गाउँपालिका ३ मा रहेको जनकल्याण सामुदायिक पाठशालाका ४ जना र पञ्चकन्या माद्यमिक विद्यालयका १ जना विद्यार्थीलाई उपलब्ध गरेको दुई वर्षे छात्रवृत्तिबापतको अन्तिम किस्ताको रकम हस्तान्तरण गरिएको हो ।
गत शुक्रबार आयोजित एक समारोहमा प्रमुख अतिथि पञ्चकन्या ३ का वडाध्यक्ष रामबाबु पराजुली, एनआरएनए जापानका नवनिर्वाचित सचिव अर्जुन थापा, पञ्चकन्या माविका प्रधानाध्यापक रामबहादुर विष्ट, जनकल्याणका सञ्चालक प्रमुख टीकाराम तामाङ, प्रधानाध्यापक डीबी क्षेत्रीलगायतको उपस्थितिमा उक्त रकम हस्तान्तरण गरिएको हो ।
एनआरएनए कान्साईका निवर्तमान संयोजक तथा एनआरएनए जापानका सदस्य दिलीप शर्मा नेतृत्वको कार्यसमितिले ती दुई विद्यालयका ५ जना विद्यार्थीलाई दुई वर्षका लागि जनही १० हजार रुपैयाँ रकम उपलब्ध गराएको थियो ।
कार्यक्रममा एनआरएनए जापानका नवनिर्वाचित सचिव अर्जुन थापालाई विद्यालय परिवारले सम्मानसमेत गरेको थियो ।
