नुवाकोट । नुवाकोट जिल्लामा शंख बजाउने प्रतियोगिता हुने भएको छ । आगामी मंसिर ६ गते विदुर नगरपालिका वडा नम्बर ५ देविघाटमा शंख बजाउने प्रतियोगिता हुने भएको हो ।
स्थानिय मौलिक कला संस्कृतिको जगेर्ना गर्न भन्दै नुवाकोटको पहिलो सामुदायिक रेडियो नुवाकोट एफएमले प्रतियोगिता आयोजना गर्न लागेको हो । हरिवोधनी एकादशीको अवसर पारेर प्रतियोगिता गर्न लागिएको हो ।
सनातनी हिन्दु धर्मका विभिन्न संस्कारमा नभई नहुने “शंख” संरक्षण र सम्बद्र्धनार्थ जिल्लामै पहिलो पटक ‘खुल्ला शंख ध्वनी प्रतियोगिता’को आयोजना गर्न लागिएको आयोजकले दाबी गरेको हो ।
प्रतियोगितामा प्रथम हुनेलाई नगद दशहजार हजार रुपैयाँ, द्वितिय हुनेलाई सातहजार रुपैयाँ, तृतीय हुनेलाई पाँच हजार रुपैयाँ, र सान्त्वना तिन हजार रुपैयाँ नगद र प्रमाण–पत्र प्रदान गरिने भएको छ ।
प्रतियोगितामा सम्पूर्ण उमेर समूहका इच्छुक व्यक्तिले सहभागिता जनाउन सक्नेछन् ।
