जिल्ला प्रहरी कार्यालय नुवाकोटले अपहरण कसुरमा दुई जनालाई पक्राउ गरेको छ। पक्राउ पर्नेमा ककनी गाउँपालिका-४ बस्ने ३० वर्षीय राजकुमार तामाङ र शिवपुरी गाउँपालिका-८ बस्ने २४ वर्षीय चन्द्रबहादुर तामाङ रहेका छन् ।
ककनी गाउँपालिका–४ का ५६ वर्षीय सूर्यबहादुर तामाङलाई बन्धक बनाएको आरोपमा उनीहरूलाई नियन्त्रणमा लिइएको प्रहरीले जनाएको छ ।
प्रहरीका अनुसार, यही माघ २२ गते राति बा६ज ७७७९ नम्बरको गाडीमा जाँदै गरेका सूर्य बहादुरको गाडी सहित उनीहरूले अपहरण गरेका थिए । उनीहरूले काउलेदेखि ककनी जाने सडकबाट अपहरण गरेर पञ्चकन्याको कबिलास जाने सडकको एकान्तमा लगेर बन्धक बनाई फिरौती रकम मागेका प्रहरीले जनाएको छ ।
खटिएको प्रहरी टोलीले फिरौती रकम लिन आएको अवस्थामा दुवै जनालाई काठमाडौंको माछापोखरीबाट पक्राउ गरिएको हो । सूर्यबहादुरलाई सकुशल अपहरणमुक्त गरिएको प्रहरी प्रधान कार्यालयले जानकारी गराएको छ ।
पक्राउ परेका विरुद्ध प्रहरीले जिल्ला अदालत नुवाकोटबाट अपहरण तथा शरीर बन्धक मुद्दामा सात दिन म्याद थप अनुमति लिएको छ ।
