सिके राउतको जनमत पार्टी सरकारमा सहभागी नहुने बताएको छ। तर इलामको प्रतिनिधिसभा निर्वाचन क्षेत्र नं. २ तथा बझाङको प्रदेश सभा क्षेत्र नं. १ (१) मा हुन गइरहेको निर्वाचनमा भने आफ्नो उम्मेदवारी दिने भएको छ।
पार्टीका प्रवक्ता डा. शरद्सिंह यादवले पार्टीको केन्द्रीय सचिवालयको हालैको बैठकले उक्त निर्णयहरु गरेको जानकारी दिए।
उनका अनुसार पार्टीले इलाम र बझाङमा हुन लागेको निर्वाचनमा उम्मेदवारी दिनुका साथै नयाँ बनेको सत्तागठबन्धनमा तत्कालै सहभागी नहुने र सप्तरीमा ०८० साल माघ ८ गते भएको घटनाको छानबिन गर्न बनेको समितिले दिएको प्रतिवेदनउपर छलफल गरी निर्देशित प्रक्रिया अगाडि बढाउने निर्णय गरेको बताए ।
