काठमाडौं । राष्ट्रिय प्रजातन्त्र पार्टी (राप्रपा) का सांसद ज्ञानेन्द्रबहादुर शाहीले क्रिकेटर सन्दीप लामिछानेलाई अमेरिकी दूतावासले भिसा नदिनु मुलुकको नै अपमान भएको कुरा आज संसदमा उठाएका छन् ।
सांसद शाहीले पञ्चशीलको सिद्धान्तविपरीत अमेरिकाले नेपाली खेलाडीलाई भिसा नदिएको बताए ।
‘जुन देशले विश्वकप आयोजना गर्छ त्यही देशले हाम्रो खेलाडीलाई अगाडि जान दिँदैन । आज हामीले के का आधारमा परराष्ट्र नीति बनाएका छौँ । परराष्ट्र नीति पञ्चशीलका आधारमा बनाएको हो की पार्टीको कार्यकर्ताको मेनोफेस्टोको आधारमा’, उनले आज संसदमा प्रश्न उठाए ।
सांसद शाहीले नेपालको बेइज्जत हुँदा पनि काम गर्न नसक्ने भन्दै खेलकुद, पराष्ट्रमन्त्री र मन्त्रालयको नैतिकतामा प्रश्न उठाए । ‘अदालतले न्याय दिन्छ, क्यानले नाम पठाउँछ, आईसीसीले स्वीकृत गर्छ, खेलाडीको भिसा लाग्दैन । अनि, प्रधानमन्त्री र मन्त्री देशको झण्डा हल्लाएर हिँड्न लाज लाग्दैन ?’, उनले भने,।
