काठमाडौँ । पेट्रोलियम पदार्थ ढुवानी गर्ने ट्यांकर चालकहरुको आन्दोलन स्थगित भएको छ । उद्योग वाणिज्य तथा आपूर्ति मन्त्रालयमा सोमबार नेपाल आयल निगमसहित भएको छलफलमा चालकका मागको बारेमा अध्ययन गर्न एक समिति बनाउने निर्णय भए पछि उनीहरुले आन्दोलन स्थगित गरेका हुन् ।
आन्दोलनरत पक्षसग दुई हप्ता भित्र समस्या समाधान गर्ने गरी सहमति भएको छ । नेपाल पेट्रोलियम ट्यांकर चालक संघले सात बुँदे माग राखेर ढुवानी नगरेपछि आइतबारदेखि उपत्यकाका पेट्रोल पम्पमा डिजेल र पेट्रोलको अभाव भएको हो ।
चालक तथा सहचालकले मजदुरहरूको श्रम ऐन अनुसार नियुक्ति दिई नेपाल सरकारले तोके अनुसारको तलव व्यवस्था गर्नुपर्ने, स्वरोजगारको हकमा मात्र लागू गरिएको दोब्बर बैंक ग्यारेन्टी र वार्षिक नवीकरण खारेज गर्नुपर्ने, तापक्रमको सही व्यवस्थापन गर्नुपर्ने लगायतका माग अघि सरेर आन्दोलन गरेका थिए ।
आइतबारदेखि व्यवसायीहरुले पेट्रोलियम पदार्थको ढुवानी रोक्दा अहिले बजारमा चरम अभावको अवस्था छ । साझा, नेपाल प्रहरी, नेपाली सेनाको पेट्रोल पम्पमात्रै खुल्दा ती पम्पहरुमा तेल भर्नेको भीड लागेको छ ।
आज बसेको वार्ता सहमतिमा पुगेसगै अब आज साँझसम्म निजी पम्पहरुले पनि वितरण थाल्ने बताइएको छ ।
