काठमाडौं, २५ साउन । नेपाल विद्युत प्राधिकरणका कार्यकारी निर्देशक कुलमान घिसिङले सार्वजनिक लेखा समितिलाई ५० हजार पेजको कागजात पठाएको बारेमा जवाफ दिएका छन् ।
आज आयोजित पत्रकारसम्मेलनमा घिसिङले समितिलाई पठाएको सबै कागजात सम्बन्धित रहेको बताएका हुन् । घिसिङले डेडिकेटेड तथा ट्रंक लाइन विवादका विषयमा समितिलाई एक ट्रक कागजात पठाएका थिए । तर समितिले कुलमानले अनावश्क कागजात पठाएको भन्दै फिर्ता गर्ने बताएको छ ।
घिसिङले ड्रेडिकेटेड तथा ट्रंक लाइनको महसुलसँग सम्बन्धित डकुमेन्टसँगै सर्पोर्टका अन्य विवरणहरू पनि समितिमा पठाउँदा केही धेरै हुन पुगेको बताए ।
‘सबै हाम्रो सम्बन्धित र आवश्यक डकुमेन्ट बुझाएको हो । हामीसँग घन्टा घन्टाको विद्युत खपतको रेकर्ड हुन्छ । त्यो रेकर्डको सफ्ट कपीको प्रिन्ट नै ४० कि ५० हजार आएको छ । त्यो पनि पठाएका छौं । एमपावर भन्ने सफ्ट वेयरमा भएको सबै डाउनलोड गरेर पठाइदियौं । पछिल्लो चरणमा गरेका बिलिङको प्रिन्ट र एक्सेल सिट पनि पठाइदियौं । यसैगरि, अदालतबाट भएका ९०वटा निर्णयमा विभिन्न व्याख्या भएको छ । ती सबै व्याख्याको फोटोकपि गरेर पठाएका छौं,’ उनले बताए।
