काठमाडौं । प्रधानमन्त्री केपी शर्मा ओलीको ज्यान लिने धम्की दिने व्यक्ति पक्राउ परेका छन् ।
पक्राउ पर्नेमा धादिङको गजुरी गाउँपालिकाका राजन लामा हुन् । उनी गजुरीमा खेलकुद प्रशिक्षकका रूपमा कार्यरत छन् । उनले सामाजिक सञ्जालमार्फत प्रधानमन्त्रीसहित नेताहरूको ज्यान लिने धम्की दिएका थिए ।
लामाले नेपाल विद्युत् प्राधिकरणका प्रबन्ध निर्देशक कुलमान घिसिङको समर्थनमा प्रधानमन्त्रीसहित एमालेका नेताहरूलाई धम्की दिएका हुन् । फेसबुकमा लेख्दै ओली र एमाले कार्यकर्तालाई गालीगलौज मार्ने धम्कीसहितको अभिव्यक्ति दिएका लामालाई आइतबार साँझ प्रहरीले पक्राउ गरेको हो ।
गजुरी गाउँपालिका वडा नम्बर ६ निवासी उनी नेकपा माओवादी केन्द्रका कार्यकर्ता हुन् । उनलाई गजुरी गाउँपालिकाले खेलकुद प्रशिक्षकको रुपमा भर्ना गरेको थियो ।
