भोजपुर । प्रकाश तामाङ ‘काले’ ले नागरिकता प्रमाण पत्र पाएका छन्।
आइतबार प्रशासनका अधिकारीले प्रकाशलाई उहाँको घर भोजपुर षडानन्द नगरपालिका–१० छाप्लेगाउँ (साम्पाङ) मा पुगेर नागरिकताको प्रमाणपत्र प्रदान गरेका हुन् ।
‘हेर्ने कथा’ मार्फत भेटिएका प्रकाशलाई उहाँको बुवा–आमासँग नाता कायम र जन्मदर्ताको कागज बनाएर नागरिकता दिइएको हो ।
षडानन्द नगरपालिका मेयर सुरेन्द्र उदास, वडा अध्यक्ष प्रेम दोर्जी शेर्पा, इलाका प्रशासन कार्यालय प्रमुख बिनोद ज्ञावली, नगरपालिकाका प्रमुख कार्यकारी अधिकृत मोहन चापागाईंको उपस्थितमा प्रकाशलाई नागरिकताको प्रमाणपत्र प्रदान गरिएको हो ।
यसैबीच, प्रधानमन्त्री केपी शर्मा ओलीले प्रकाशलाई भेट्न काठमाडौँ बोलाएका छन्। नागरिकता पाएका उनी केही दिनमै काठमाडौँ आएर प्रधानमन्त्रीसँग भेट गर्ने कार्यक्रम छ ।
ओलीले निवर्तमान गृह सचिव एवं हालका मुख्य सचिव एकनारायण अर्याललाई बोलाएर प्रकाशलाई नागरिकता दिलाउन आवश्यक पहल गर्न निर्देशन दिएका थिए ।
