काठमाडौं । राष्ट्रिय स्वतन्त्र पार्टीका सभापति एवम् चितवन क्षेत्र नम्बर दुईका सांसद रवि लामिछानेले सहकारीको विषयमा एक व्यक्तिलाई मात्रै केन्द्रीत गरिँदा सहकारी पीडितमाथि अन्याय भएको बताएका छन् ।
आज चितवनमा आफ्ना मतदातासँग सार्वजनिक सुनुवाई गर्दै लामिछानेले विभिन्न रिपोर्टहरूले सहकारीको दुई खर्ब पचहत्तर अर्ब अपचलन भएको देखाएकोमा एक व्यक्तिमाथि मात्रै प्रतिशोधपूर्ण अनुसन्धान गर्दै पीडितलाई अन्याय भएको र इतिहासले यसको मूल्यांकन गर्ने बताएका हुन् ।
आफूले कुनै पनि सहकारीको पैचा अपचलन नगरेको उनले स्पष्ट पारे । आफू कयौँ ठगहरूलाई जेल कोचेर राजनीतिमा आएको मान्छे भएको उनको भनाइ छ ।
अहिले पनि प्रतिवेदनको पाना पल्टाएर कुन न्यायाधीस, वकिल, पार्टीको मान्छेसँग कहाँ बहस गर्नुपर्ने आफू तयार रहेको उनले दावी गरे ।
